الله كريم بقلم فاطيما يوسف
هم الاثنين يروحوا للدجال علشان يشوفوا نورا معمول لها عمل ولا لا واللي اكيد هيقول لهم ان هي معمول لها عمل.
عند كريم ونورا بيتمشوا على البحر وايديهم في ايدين بعض كريم بيقول لها
ياه يا نورا عايشين مع بعض بقى لنا اربع سنين ولسه حبك في قلبي زي ما هو ما قلش ولا سنتي
بل بالعكس زاد الاضعاف يا ترى حبي في قلبك ماليه ومحاوطه زي ما هو
ده سؤال تساله لي انت اغلى واحلى حاجه في حياتي
انت النفس وانت العشق وانت الروح
وكملت وهي بتبص جوه عينيه
عارف يا كريم عمري ما اتضايقت ان احنا لسه ربنا ما رزقناش بخلفه ولا اتضايقت ان انا لسه ما بقتش أم
علشان عارفه ان كل شيء عند ربنا بمقدار واكيد تاخيره عننا الخلفه له حكم احنا ما نعرفهاش
كل اللي بيضايقني نظرات اللي حوالينا وهمستهم وكلامهم اللي زي الخڼجر بالرغم اني عمري ما بصيت في حياه حد ولا شغلت بالي بحد
ولا غيرت من اللي عند حد ولا فكرت إني أأذي حد بلساني ولا بكلامي ولا حتى بالنظره
بس انا اللي مصبرني وجودك جنبي وان ربنا مسخر لي ملايكه بيردوا عليا
وقربي من ربنا اللي مديني القوه اني استحمل وان ما نزلش لمستواهم من الدنائة
ربنا اكرمني بيكي يا نورا انا حاسس ان انتي حد كبير قوي عليا
ربنا اداني النور اللي منور لي طريقي وسط العتمه
ربنا ما يحرمني منك ولا من وجودك جنبي ولا من حنيتك عليا يا حبيبتي .
وفضلوا مكملين مشيهم على البحر ايديهم في ايدين بعض في مكان ما حدش يعرفهم فيه ولا هم يعرفوا في حد
مكان ما حدش هيقعد يلوم عليهم فيه ولا يكسر نفسهم ولا يفكرهم باللي هم ما بينسوهوش اصلا
وسعات بيكون حوالينا ناس بيعدوا علينا النفس اللي احنا بنتنفسه وشاغلين بالهم بينا اكثر ما احنا شاغلينه بنفسنا
بجد الناس دول مؤذيين قوي وساعات الناس دول بيكونوا هم نفسهم اللي مننا اللي ما نقدرش نبعد عنهم ومضطرين نتحملهم حتى لو ضغطنا على نفسنا
ثاني يوم في الفندق كريم ساب نور نايمه علشان هيعمل لها مفاجاه النهارده عيد ميلادها
هو بيحاول يفرحها شويه وترجع من الاجازه دي نفسها مفتوحه وناسيه الألسنه السليطه اللي بټجرح قلبها كل يوم
وخلاص جه بالليل طلب كريم من نورا انها تلبس دريس حلو علشان خاطر عامل لها مفاجاه وقعدت تتحايل عليه علشان يقول لها لكن هو رفض رفض تام
واول ما نزلت نورا لقت المكان متزين بالبالونات المنفوخه بالهيليوم ومعمول بيها ستائر وفي وسط الستائر محطوط بوكس كبير في هديتها اللي هو جابها لها
وبصت له كده علشان تتاكد ان دي فعلا حفله صغيره لعيد ميلادها اللي ما احتفلتش بيه بقى لها سنتين
وده طبعا كان بيجي من رفضها بسبب اللي حواليها اللي بيقعد يقولوا ليها نفس تعمل عيد ميلاد وهي ما بتخلفش
شدها كريم ووقفها قصاد التورتايه الكبيره وۏلع الشمع والناس اتجمعت حواليهم وغني لها اغنيه عيد الميلاد وفرحوها
وكريم قال لها
وطي واطفي الشمع يا نور وباذن الله السنه الجايه ربنا يكون كرمنا وجبنا أينور بنتنا
سمعت كلامه بفرحة وكأنها طفلة و طفت الشمع وهي مبسوطه وفرحانه جدا من جواها وراح كريم جايب لها البوكس اللي حاطط فيه هدية عيد ميلادها
واللي كانت عباره عن ملابس إحرام ليهم هم الاثنين والبيبي الصغنون ومصحف وسبحه وشوكولاتات كثير وعلبه قطيفه فيها انسيال رقيق محفور باسمها
اتجمعت دموع الفرحه في عيون نورا من الهديه الجميله اللي فهمت محتواها وبصت له بأمل علشان تفهم منه
قرب كريم منها وراح جنب ودنها وهمس
كل سنه وانتي طيبه يا أحلى عمر راح وأحلى عمر جاي
واجمل سنين عمر قضيتها معاكيفي سعادة ودايما قريبه من قلبي يا نور العين
الدكتور طمني ان خلاص الحمد لله اجتازت فتره العلاج واني خلاص بقيت سليم ميه في الميه من قبل ما نسافر قلت اخدك ونسافر وكاننا بنقضي شهر عسل جديد
ولقيت ان عيد ميلادك قرب فجبت لك الهديه دي علشان باذن الله اول ما ربنا يكرمنا وتحملي وتيجي بنتنا أو ابننا للدنيا هاخدك ونسافر لأطهر مكان في العالم كله
انا وانتي والمولود اللي انا واثق ان ربنا هيرزقنا بيه بعد سنين العجاف اللي احنا عشناه
برقت نورا بعينيها من اثر الصدمه وقالت له وهي حاطه ايديها على كتافه وبتلف بيه
بجد بجد يا كريم ربنا مالنا عليك بالشفاء وخلاص قهر وتعب السنين هينتهي
بجد انا مش مصدقه نفسي .
حضنها كريم حضڼ كبير واشتغلت اغنيه ضميني وانسي الدنيا ضميني وانسي الناس ورقصوا الاثنين رقصه سلو على الاغنيه المفضله ليهم واللي كان كريم متفق عليها مع الدي جي
وكملوا بقية الاسبوعين في فرحة وهناء وسعاده من غير ضغوطات ورجعوا الاثنين على عشهم السعيد
ورجع كريم لشغله واثناء ما نورا قاعده مع حماتها قالت لها
بقول لك ايه يا نورا انا رجلي تعبانه وعايزاكي تيجي معايا عند الدكتور علشان نجوى إنتي عارفه خلاص فرحها قرب ومش فاضيه قلت ايه يا حبيبتي .
ردت عليها نورا وقالت لها
من عيني يا امي انتي تؤمريني عايزه تروحي امتى يا ست الكل
ردت عليها حماتها
النهارده باذن الله بعد المغرب انا واخده ميعاد مع الدكتور .
اتصلت نورا بجوزها واستاذنته انها هتروح مع والدته عند الدكتور واداها الاذن وقال لها
اسالي لي ماما كده على مكان الدكتور علشان
خاطر لو في عندي وقت اجي اخذكم بدل ما تتبهدلوا في المواصلات .
سألت نور حماتها اللي اتلجلجت وقالت لها
ما فيش داعي يعطل نفسه احنا هناخد عربيه مخصوص
سمع كريم اللي والدته قالته ورد عليهم
تمام الف سلامه عليكي يا ست الكل .
وبعد المغرب ركبوا العربيه وروحوا المكان اللي حماتها واخداها فيه وكل ده نورا ماشيه معاها وهي واثقه فيها
المهم وصلوا المكان ودخلت نورا ما استغربتش طبعا لقيت في ناس كثير قاعدين بره وواحده قاعده على كرسي ست كبيره كأنهم في عياده بالظبط
دخلوا في دورهم وأول ما دخلت نورا وشافت اللي شافته قلبها انقبض وطب في رجليها وبصت لحماتها بړعب
انت جايباني فين جايباني عند دجال!
عمري ما كنت اتصور ان انت تعملي فيا كده
! للدرجه دي الجهل سيطر عليكي انك تجيبيني عند واحد زي ده
ما خفتيش عليا من اني يعمل لي حاجه او يأذيني او يأذي ابنك
انتئ ازاي كده وازاي بتفكري كده وازاي دماغك كده
وفورا طلعت تليفونها واتصلت بجوزها وحماتها عماله تشد منها التليفون واټرعبت من اللي ابنها هيعرفه لكن ما قدرتش على نورا وقالت لجوزها كل حاجه في التليفون بسرعه البرق وعرفته المكان
راح الدجال قايم عليهم هم الاثنين وطردهم
بره غوري يا وليه انت وهي من هنا انا مش ناقص
